ОшМПУнун эң мыкты 200 студенти 100 жылдыктын атайын төш белгиси менен сыйланды

Бүгүн Ош мамлекеттик педагогикалык университетинде мыкты окуган студенттерге «100» жыл мааракелик төш белгиси тапшырылды.

Иш-чарага университеттин ректору Бекмурза Зулуев, окуу иштери боюнча проректор Каныбек Раимбеков, Профсоюз комитетинин төрагасы Кубаныч Жылкычы уулу, “Фэйворс Фаундэйшн” коомдук фондунун негиздөөчүсү Со Джи Хён, факультет декандары, окутуучулар жана мыкты окуган, тарбиялык иштерге активдүү катышкан факультеттерден тандалып алынган студенттер катышты.

Саамалыкты ректор Бекмурза Зулуев ачып берип, окуу жайдын кылымдык тарыхына, өнүгүүсүнө жана бул жолдогу студенттердин салымына токтолду. Ошондой эле ал келечектеги пландар тууралуу айтып, мыкты студенттерге мааракелик төш белгилерди өз колу менен тапшырды. Аны улай 100 жылдыкка арналган тарыхый видео тасма көрсөтүлдү.

Бул менен бирге “Фэйворс Фаундэйшн” коомдук фондунун негиздөөчүсү Со Джи Хён айым сөз сүйлөп, фонддун ишмердүүлүгү жана анын алкагында университетте ачылган “Инвитент” кафесинен түшкөн каражат кайрымдуулукка жумшалаарын айтты. Ошондой эле фонд тарабынан 11 студенттин бир жылдык келишим акылары төлөнөрүн билдирип, аларга атайын сертификаттарды тапшырды. Бул колдоо студенттер окууну аяктаганга чейин уланарын белгиледи.

Иш-чара таланттуу студенттер менен окутуучулар даярдаган концерттик программа менен коштолуп, катышуучуларга майрамдык маанай тартууланды.